1. Жәкішевтің анасы қайтыс болды
2. Жаңа қаржы министрі тағайындалды
3. Әкім және такси
4. Корей басшылары тағы кездесті
Түрмеде отырған «Қазатомпром» компаниясының бұрынғы президенті Мұхтар Жәкішевке анасының жерлеу рәсіміне келуіне рұқсат бермеді.
Қылмыстық-атқару жүйесі комитеті (ҚАЖК) баспасөз қызметінің жетекшісі Ғалымжан Хасеновтің хабарлауынша, Семей түрмесінің басшылығы Жәкішевке анасының қайтыс болғаны жайлы хабарды жеткізген. Колония бастығы көңіл айтқан. Мұхтар Жәкішев қыркүйектің 19-ы күні болатын анасының жерлеу рәсіміне баруға рұқсат сұрап, үшін өтініш жазған. Бірақ өтініші қанағаттандырылмаған. Оның себебін Қылмыстық-атқару кодексінің "Мекеменің шегінен тыс жерге шығу" туралы 113-бабының 5-тармағымен түсіндіреді. Онда "қылмыстық топ құрамында жасалған қылмыстармен сотталғандарға сыртқа шығуға рұқсат етілмейді" деп көрсетілген.
80 жасқа келіп қалған Раиса Нұрғалиқызы Алматыда қыркүйектің 18-і күні таңертең қайтыс болды. Соңғы жалдары қатты ауырған ол президент Нұрсұлтан Назарбаевқа хат жазып, ұлының ауыр науқасқа шалдыққанын айтып, ұлына рақымшылық жасауды, тірі кезінде босатуды сұрап қайырылған.
55 жастағы Мұхтар Жәкішев 2009 жылы мамырда ұсталған соң сыбайлас жемқорлық қылмысын жасады деп айыпталып, 14 жылға сотталған. Қазір жазасын Семей қаласындағы қатаң режимдегі колонияда өтеп жатыр. Жәкішев саясатпен айналыспағанымен, 2013 жылы қазақстандық бірқатар құқық қорғау ұйымдары оны саяси тұтқын деп таныған.
--
Қазақстан президентінің жарлығымен Әлихан Смайылов елдің қаржы министрі болып тағайындалды. Нұрсұлтан Назарбаевтың жарлыққа қол қойғаны туралы премьер-министрдің баспасөз қызметі хабарлады.
18 қыркүйекте Қазақстан мәжілісінің депутаттары Қаржы және бюджет комитетінің отырысында Қаржы министрі лауазымына Әлихан Смайыловтың кандидатурасын қолдаған. Смайловты бұл қызметке премьер-министр Бақытжан Сағынтаев ұсынған.
Смайылов 2015 жылдан бері президент көмекшісі болған. Бұрындары Президент әкімшілігінде жұмыс істеген. Елдің статистика агенттігін басқарған. Сыртқы істер министрі мен қаржы министрінің орынбасары қызметтерін атқарған.
Бұрынғы қаржы министрі Бақыт Сұлтанов Қазақстан президенті Нұрсұлтан Назарбаевтың жарлығымен Астана әкімі қызметіне тағайындалған. Ал Астана әкімі болған Әсет Исекешев қазір президент әкімшілігін басқарады.
--
18 қыркүйекте Оңтүстік Корея президенті Мун Чжэ Ин үш күндік сапармен Пхеньянға келді. Әуежайда оны Солтүстік Корея президенті Ким Чен Ын күтіп алды. Бұл - Оңтүстік Корея президентінің соңғы 11 жылдағы Солтүстік Кореяға жасаған алғашқы сапары.
Мун Чжэ Ин мен Ким Чен Ын екеуі бір көлікке отырып, сыйлы қонақтарға арналған "Пэкхвавон" резидентциясына барды. Онда бүгін келісөздердің алғашы кезеңі басталады. Екі ел президенті Солтүстік Корея ядролық бағдарламасын тоқтату, қос Кореяның өзара байланысы, Пхеньян мен Вашингтон арасындағы диалогтың жалғасы сияқты мәселелерді талқылайды.
Бұл - қос Корея жетекшілерінің соңғы бір жылдағы үшінші саммиті. Екі саммит биыл сәуір мен мамыр айларында өткен. Сәуірдегі кездесуінде Мун Чжэ Ин мен Ким Чен Ын екі ел арасында бейбіт келісім жасауға ниетті екендіктерін мәлімдеген.
Негізгі бет Ойын-сауық Жәкішевтің анасын жерлеу рәсіміне қатысуына рұқсат етілмеді
Пікірлер: 235